О священная главо, отче Илие преподобне, угодниче преизрядный Господень, теплый молитвенниче о всех к помощи твоей с верою прибегающих, малодушных утешителю и всем в скорбех и болезнех пребывающих скорый помощниче и заступниче.Помози нам, грешным и унылым, бурею сомнений в суете житейскаго моря потопляемым, достигнути тихаго пристанища — Небеснаго Царствия.Умоли Господа, всяческих благ Подателя, получити прощения многих наших грехов. Настави нас, многими соблазнами мира сего искушаемых, на пути смирения, терпения, чистоты духовныя и телесныя и искренней любви к Богу и ближним, да не погибнем люте без покаяния.Святче Божий, подобне древлему пророку, тезоименитому Илии, ревностию объятый по Господе Бозе Вседержителе, даруй и нам разслабленным дух ревности ко спасению, укрепи сердца наша в правой вере, Церковь Святую сохрани от всякаго мятежа и раскола. Град твой, Отечество наше и всякую страну христианскую огради и сохрани молитвами твоими от глада, потопа, нашествия иноплеменных и междуусобныя брани. Старость поддержи, юность уцеломудри, младенцы воспитай, на всякую добродетель нас грешных настави. Кончину жития нашего причастну Святых Таин Христовых быти сподоби, да с верою и любовию прославим со ангельскими силами во Царствии Небеснем, идеже и ты пребываеши, Бога в Троице славимаго Отца, и Сына, и Святаго Духа во веки веков. Аминь